Jessica@SG被開價20萬上郵輪過夜

組合Super Girls(SG)成員Jessica憑一雙白滑美腿成功俘虜宅男,日前獲一名自稱「有錢男」的網友出錢利誘陪食飯及行街,Jessica與隊友分享惡作劇時,竟遭好姊妹Cheronna取笑是「出租女友」!Jessica透露曾有網友開價20萬邀請她上郵輪過夜,但腳踏實地的她強調不會為搵快錢而沖昏頭腦。

近年不少女藝人都被「問價」及收到「飯局」邀請,當中甚至有人列明價錢利誘她們做「出租女友」。SG成員Jessica日前亦收到「邀請」,她上載一名自稱「有錢男」的網友邀約短訊截圖,內容為:「I would like to pay you for shopping and dinner.You interest?(我想畀錢同你購物同食飯,你有冇興趣?)」抵死的Jessica在截圖寫上:「Seriously?咁大隻蛤乸隨街跳?」

得啖笑 拒賺快錢
Jessica昨日接受電話訪問,她認為事件只是一場惡作劇,並自爆與好姊妹Cheronna「開心Share」時被取笑:「佢話我見識少,話網上依家有Partime Girlfriend(出租女友),我真係唔知,究竟依家咩世代?」問到是否經常收到邀約短訊?她說:「好少睇inbox,係咁啱開嚟睇,覺得好好笑,每次見到都會同好姊妹分享。」問到是否心動做出租女友?她堅定地說:「冇!擺明搞笑啦,點會發生喺我身上?」

小康之家出身的Jessica認為做人最緊要腳踏實地,以及靠雙手努力賺錢,她透露早年收過一個邀約訊息,有人出價20萬邀請她上郵輪:「話畀20萬我上郵輪過一晚夜,其實每次都當惡作劇,亦唔會理。嗰次都有同姊妹傾,大家都係得啖笑,仲開玩笑話原來我值呢個價!」問到她會否對「出租男友」有興趣?她笑說:「畀錢人哋陪自己食飯、買嘢,咁我寧願留喺屋企!」

未經允許不得轉載:香港丁圖媒體 » Jessica@SG被開價20萬上郵輪過夜
Like(0)